Hərbi xidmətə çağırış sahəsində qanun pozuntularının aşkarlanması, korrupsiyaya qarşı mübarizə və şəffaflığın artırılması məqsədilə Baş Prokurorluq Səfərbərlik və Hərbi Xidmətə Çağırış üzrə Dövlət Xidməti (SHXÇDX) və digər aidiyyəti dövlət qurumları ilə birgə tədbirləri davam etdirir.
Baş Prokurorluğun məlumatına görə, 2026-cı ilin yanvar ayından indiyədək Baş prokuror yanında Korrupsiyaya qarşı Mübarizə Baş İdarəsində SHXÇDX-nin təqdim etdiyi rəsmi məlumatlar və vətəndaş müraciətləri əsasında 124 vəzifəli şəxs, eləcə də qanunazidd əməllərdə iştirakı ehtimal olunan 121 şəxs barəsində hərtərəfli araşdırmalar aparılıb.
Həmin dövrdə hərbi xidmətə çağırış sahəsində qanunvericiliyin pozulması faktları ilə bağlı 4 əməliyyat-axtarış tədbiri keçirilib. Faktlar üzrə cinayət işləri başlanaraq İstintaq idarəsinə göndərilib.
Ümumilikdə, SHXÇDX-nin vəzifəli şəxsləri və digər şəxslər barəsində 8 cinayət işi üzrə ibtidai istintaq aparılıb. Onlardan 8 şəxs (7 vəzifəli şəxs və 1 vətəndaş) barəsində 5 cinayət işi üzrə istintaq tamamlanaraq məhkəmələrə göndərilib. Həmin işlər üzrə 6 təqsirləndirilən şəxs barəsində həbs, əlavə qətimkan tədbiri kimi vəzifədən kənarlaşdırma, 2 şəxs barəsində isə polisin nəzarəti altına vermə qətimkan tədbirləri seçilib.
Hazırda 3 cinayət işi üzrə ibtidai istintaq davam edir. Onlardan biri üzrə 2 şəxs barəsində həbs və vəzifədən kənarlaşdırma qətimkan tədbirləri tətbiq olunub.
İstintaq zamanı 3 cinayət işi üzrə 9 çağırışçı barəsində komisyon məhkəmə-tibbi ekspertizası təyin edilib. Nəticələrə əsasən, 1 şəxs hərbi xidmətə yararlı hesab olunub, 2 şəxsə xidmətdən möhlət hüququ verilib. Digər 6 şəxs üzrə ekspertiza davam edir.
İstintaq olunan cinayət işləri və araşdırılan materiallar üzrə tibbi müayinələrin tam aparılmaması, yanlış diaqnozlar səbəbindən səhhətində problem olan çağırışçıların xidmətə göndərilməsi və sonradan vaxtından əvvəl tərxis olunması, eləcə də SHXÇDX-nin yerli qurumlarında daxili yoxlamalar zamanı qanun pozuntularına yol verilməsi faktları müəyyən edilib.
Nöqsanların aradan qaldırılması üçün aidiyyəti qurumlara ümumilikdə 32 təqdimat göndərilib. Onlardan 18-i SHXÇDX-yə, 6-sı Səhiyyə Nazirliyinə, 4-ü TƏBİB-ə, 3-ü Dövlət Tibbi Sığorta və Ekspertiza Agentliyinə, 1-i isə Müdafiə Nazirliyinin Məhkəmə Tibbi Ekspertiza və Patoloji Anatomiya Mərkəzinə ünvanlanıb. Təqdimatların 14-ü birbaşa Xidmətin 35 yerli strukturunda sənədləşmənin qanunvericiliyin tələblərinə uyğun aparılmasını əhatə edib.
Görülən tədbirlər nəticəsində SHXÇDX-nin 2 əməkdaşı intizam məsuliyyətinə cəlb olunub, 4 həkimə, 10 vəzifəli şəxsə və 1 fiziki şəxsə xəbərdarlıq edilib. Müvafiq kollektivlərdə müzakirələr aparılıb.
Hazırda 5 təqdimat üzrə icraat davam etdirilir.
Baş Prokurorluq bildirib ki, hərbi xidmətə çağırış sahəsində şəffaflığın təmin edilməsi, korrupsiya hüquqpozmalarının və digər neqativ halların qarşısının alınması istiqamətində tədbirlər davam etdiriləcək və nəticələri barədə ictimaiyyətə məlumat veriləcək.
