Azərbaycan Prezidentinin köməkçisi Hikmət Hacıyev bildirib ki, İsraildə qondarma “erməni soyqırımı”nın tanınması ilə bağlı təşəbbüsün qarşısının alınması üçün Bakı birbaşa diplomatik addımlar atıb.
Onun sözlərinə görə, Azərbaycan bu məsələni Türkiyə qarşısında qardaşlıq borcu hesab edib və bunun üçün heç bir təşəkkür gözləmir.
Hacıyev qeyd edib ki, İsraildə bu məsələ gündəmə gələndə Azərbaycan bunu ən sərt şəkildə pisləyən ilk ölkə olub.
“Bu, bizim üçün qırmızı xətdir. Prezident İlham Əliyevin tapşırığına əsasən İsrail tərəfi ilə əlaqə saxladıq və bildirdik ki, bu addım nə Türkiyəyə təzyiq göstərəcək, nə də İsrailə hər hansı fayda verəcək. Əksinə, Türkiyə-İsrail münasibətlərinə, eləcə də Azərbaycan-İsrail əlaqələrinə və Azərbaycan ictimaiyyətində İsrailə münasibətə zərər vuracaq”, – deyə o bildirib.
Hikmət Hacıyevin sözlərinə görə, İsrail tərəfi bu arqumentləri qəbul edib və təşəbbüsün geri çəkilməsinin doğru qərar olduğunu anlayıb.
