Samux rayonunda baş verən kütləvi zəhərlənmə nəticəsində 10 nəfər xəstəxanaya yerləşdirilib.
Hadisə rayonun Alıuşağı kəndində qeydə alınıb. İlkin məlumata görə, sakinlər halva yedikdən sonra özlərini pis hiss ediblər.
TƏBİB-in məlumatına görə, iyulun 15-də saat 15:30 radələrindən etibarən 7-si azyaşlı olmaqla 10 nəfər (4 kişi, 6 qadın) zəhərlənmə şübhəsi ilə Gəncə Şəhər Birləşmiş Xəstəxanasının nəzdindəki Abbas Səhhət adına xəstəxananın Yoluxucu xəstəliklər şöbəsinə hospitalizasiya olunub.
Bildirilib ki, pasiyentlərə zəruri tibbi yardım göstərilib, onların müalicəsi davam edir. Hazırda vəziyyətləri orta ağır qiymətləndirilir.
Baş verən hadisənin səbəblərinin müəyyənləşdirilməsi məqsədilə Azərbaycan Qida Təhlükəsizliyi Agentliyinin (AQTA) mütəxəssisləri digər aidiyyəti qurumlarla birlikdə araşdırmalara başlayıblar.
Qurumdan bildirilib ki, araşdırmanın nəticələri barədə ictimaiyyətə əlavə məlumat veriləcək.
