Ermənistanda itkin düşmüş hərbçilərin yaxınları bu gün yenidən hökumət binasının qarşısına toplaşaraq, yaxınlarının taleyi ilə bağlı konkret məlumatın təqdim edilməsi üçün hakimiyyətə bir həftə vaxt verdiklərini açıqlayıblar.
İtkin düşmüş əsgərin əmisi Arsen Qukasyan bildirib ki, 1990-cı illərdən etibarən azərbaycanlıların dəfn olunduğu yerlər barədə məlumata malik şəxslər təşəbbüs qrupu ilə əlaqə saxlayaraq vahid məlumat bazasının yaradılmasına kömək edə bilərlər.
O, həmçinin təşəbbüs qrupunun qarşılıqlı məlumat mübadiləsi məqsədilə Azərbaycan tərəfi ilə əlaqə yaratmağa hazır olduğunu deyib.
“Biz ağ bayraqla Həkəri körpüsünə qədər gedərək danışıqlar aparmağa hazırıq. Məqsədimiz eyni taleyi yaşayan azərbaycanlılarla əlaqə yaradaraq itkin düşmüş yaxınlarımız barədə bir-birimizə məlumat əldə etməyə kömək etməkdir”, – Qukasyan bildirib.
