Ukraynanın Odessa sahilləri yaxınlığında dron hücumu nəticəsində həlak olan “Atlas Bey” mülki ticarət gəmisinin kapitanı Səməd Nəsrullayevin cənazəsi Azərbaycana yola salınıb.
Xarici İşlər Nazirliyinin məlumatına görə, Azərbaycanın Ukraynadakı səfirliyi tərəfindən həyata keçirilən konsulluq tədbirləri və əlaqələndirmə işləri nəticəsində cənazə iyulun 17-də ölkəyə göndərilib.
Nazirlikdən bildirilib ki, həlak olan gəmi kapitanının ailəsinə və yaxınlarına bir daha dərin hüznlə başsağlığı verilir.
Xatırladaq ki, iyulun 14-də Türkiyənin “Okean Maritime” şirkətinə məxsus “Atlas Bey” adlı mülki ticarət gəmisi Odessa sahilləri yaxınlığında pilotsuz uçuş aparatının hücumuna məruz qalmışdı. Gəmidəki 11 ekipaj üzvündən 10-u Azərbaycan vətəndaşı idi və onlar daha sonra Moldovadan tranzit keçməklə Türkiyə üzərindən Azərbaycana qayıdıblar.
İyulun 16-da isə itkin düşən gəmi kapitanı Səməd Nəsrullayevin nəşi aşkarlanaraq Odessaya gətirilmişdi.
