Dövlət İmtahan Mərkəzi (DİM) I və IV ixtisas qrupları, həmçinin III qrup üzrə DT və TC altqruplarının hər ikisini seçənlər üçün coğrafiya fənni üzrə iyulun 12-də keçirilmiş qəbul imtahanının nəticələrini elan edib.
İmtahanda iştirak edən abituriyentlər nəticələri, cavab kartı, cavab vərəqinin qrafik təsviri və açıq tipli tapşırıqlar üzrə qiymətləndirmə meyarları ilə DİM-in saytında tanış ola bilərlər. Nəticələri həmçinin 7727 nömrəsinə imtahana buraxılış vərəqəsindəki kodu göndərməklə öyrənmək mümkündür.
İmtahanda iştirak üçün qeydiyyatdan keçən 30 300 abituriyentdən 916 nəfər imtahana qatılmayıb, 16 nəfərin isə qayda pozuntusuna görə nəticələri ləğv edilib. III qrup üzrə hər iki altqrupu seçən 6 057 nəfərdən 1 256-sı coğrafiya imtahanında iştirak etməyib.
I ixtisas qrupu üzrə maksimum 400 balı iki nəfər, IV ixtisas qrupu üzrə isə 15 nəfər toplayıb.
Hər iki mərhələnin nəticələrinə əsasən I ixtisas qrupu üzrə ən yüksək nəticəni 697,5 bal toplayan iki abituriyent – Bakı şəhəri Xətai rayonu Heydər Əliyev adına liseyin məzunu Həsənli Zəfər İlqar oğlu və Qubadlı rayonu Qəzyan kənd tam orta məktəbinin məzunu Məhərrəmli Aysu Sakit qızı göstərib.
IV ixtisas qrupu üzrə isə Sumqayıt şəhəri Təbiət Elmləri Təmayüllü Gimnaziyanın məzunu Tağızadə Samir Hikmət oğlu hər iki mərhələnin yekununda 700 bal toplayaraq ən yüksək nəticəyə imza atıb.
