Baş Dövlət Yol Polisi İdarəsinin (BDYPİ) əməkdaşlarının keçirdiyi nəzarət tədbirləri zamanı “Shacman” markalı yük avtomobilinin çəki parametrləri elektron tərəzi vasitəsilə yoxlanılıb.
Yoxlama zamanı dövlət qeydiyyat nişanı 99-GU-473 olan nəqliyyat vasitəsinin faktiki kütləsinin 66 ton olduğu müəyyən edilib. Sözügedən avtomobil üçün icazə verilən maksimum kütlə isə 32 tondur.
Beləliklə, nəqliyyat vasitəsinin müəyyən edilmiş maksimum kütlə həddini 34 ton, yəni iki dəfədən çox aşdığı müəyyən olunub.
BDYPİ bildirib ki, normadan artıq yüklənmə nəqliyyat vasitəsinin təhlükəsiz istismarına ciddi təsir göstərməklə yanaşı, yol-nəqliyyat hadisəsi riskini artırır və yol örtüyünün vaxtından əvvəl sıradan çıxmasına səbəb olur.
Qeyd olunub ki, ağırtonnajlı nəqliyyat vasitələrinin normadan artıq yüklənməsi tormoz məsafəsinin uzanmasına, manevr və dayanıqlıq imkanlarının azalmasına, təkərlərə, tormoz və asqı sistemlərinə düşən yükün artmasına gətirib çıxarır. Bu amillər idarəetmənin itirilməsi, texniki nasazlıqlar və ağır yol-nəqliyyat hadisələri riskini yüksəldir.
Eyni zamanda, normadan artıq yüklənmiş nəqliyyat vasitələrinin istismarı yol örtüyünün, körpülərin və digər yol qurğularının zədələnməsinə, onların istismar müddətinin azalmasına səbəb olur.
Baş Dövlət Yol Polisi İdarəsi yükdaşıma fəaliyyəti ilə məşğul olan hüquqi və fiziki şəxsləri, eləcə də sürücüləri müəyyən edilmiş çəki normalarına ciddi əməl etməyə və normadan artıq yüklənmiş nəqliyyat vasitələrinin istismarına yol verməməyə çağırıb.
