Şimali Kiprin Girnə şəhəri sahillərində sərnişin gəmisinin batması nəticəsində 8 nəfər ölüb, 237 nəfər xilas edilib.
Hadisə ilə bağlı məlumatı “TRT Haber” yayıb.
Şimali Kiprin Baş naziri Ünal Üstel bildirib ki, qəza ilə bağlı aparılan istintaq çərçivəsində gəminin kapitanı və 7 əməkdaş saxlanılıb.
Hadisə zamanı gəminin heyətində iki Azərbaycan vətəndaşının — Valeh Hümmətov və Rəşad İbrahimovun da olduğu məlum olub. Onların hər ikisi xilas edilib.
Azərbaycan-Kipr Dostluq Cəmiyyətinin rəhbəri Orhan Həsənoğlunun AZƏRTAC-a verdiyi açıqlamaya görə, Azərbaycan vətəndaşları ilkin tibbi yardım aldıqdan sonra xəstəxanadan buraxılıblar və onların səhhəti üçün təhlükə yoxdur.
