İspaniyanın Barselona şəhərində metroda baş verən yanğın nəticəsində 137 nəfər tüstüdən zəhərlənib, onlardan 40-ı xəstəxanaya yerləşdirilib.
Hadisə axşam saatlarında “Klot” və “Qlories” stansiyaları arasında qeydə alınıb. Maşinist alovu təxminən 50 metr məsafədən görərək qatarı təcili dayandırıb və xilasedicilərə məlumat verib.
Güclü tüstü səbəbindən sərnişinlər yanğınsöndürənləri gözləmədən vaqonların qapılarını açaraq tunel vasitəsilə təxliyə olunublar. Hadisə zamanı qatarda təxminən 300 nəfərin olduğu bildirilir.
İlkin məlumata görə, yanğına tuneldəki kontakt şəbəkəsinin zədələnməsi səbəb olub. Hadisə nəticəsində metro xəttində hərəkət demək olar ki, tamamilə dayandırılıb. Qatarların hərəkətinin iyulun 28-i səhər bərpa olunacağı gözlənilir.
