Ailə, Qadın və Uşaq Problemləri üzrə Dövlət Komitəsi Bakının Yasamal rayonunda fəaliyyət göstərən 98 saylı uşaq bağçasında təlim-tərbiyə alan azyaşlının qanında psixotrop maddə aşkarlanması iddiası ilə bağlı Daxili İşlər Nazirliyinə və Baş Prokurorluğa rəsmi müraciət edib.
Dövlət Komitəsindən bildirilib ki, azyaşlının səhhətində və davranışında mənfi dəyişikliklərin müşahidə olunması, həmçinin tibbi müayinələr zamanı orqanizmində sağlamlığına mənfi təsir göstərə biləcək maddələrin aşkarlanması barədə məlumatlar dərhal nəzarətə götürülüb.
Azyaşlının valideynləri Dövlət Komitəsinə dəvət olunaraq məsələ ilə bağlı onlardan ətraflı məlumat alınıb.
Faktın bütün təfərrüatları ilə obyektiv və hərtərəfli araşdırılması, həmçinin azyaşlının hüquq və mənafelərinin qorunmasının təmin edilməsi məqsədilə aidiyyəti dövlət qurumlarına rəsmi müraciətlər göndərilib.
Hazırda məsələ ilə bağlı zəruri tədbirlər davam etdirilir. Araşdırmanın nəticələrinə əsasən qanunvericiliyə uyğun tədbirlər görüləcək.
