Sentyabrın 5-də Bakıda ilk dəfə “Alufar Ironman 70.3 Baku” beynəlxalq triatlon yarışı keçiriləcək.
Yarışda 62 ölkədən 1 500 idmançının iştirakı gözlənilir.
İştirakçılar əvvəlcə Xəzər dənizində 1,9 kilometr üzəcək, daha sonra 90,1 kilometrlik velosiped mərhələsində mübarizə aparacaq və 21,1 kilometrlik qaçış məsafəsini qət edəcəklər. Qaçış mərhələsi Bakı Bulvarı boyunca təşkil olunacaq. Yarışın finiş xətti “Yeddi gözəl” fəvvarəsinin yaxınlığında yerləşəcək.
Kişilər və qadınlar arasında ilk 25 yeri tutan idmançılar 2027-ci ildə ABŞ-də keçiriləcək “Ironman 70.3” dünya çempionatına vəsiqə qazanacaqlar.
Yarış Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə keçiriləcək.
Bundan bir gün əvvəl, sentyabrın 4-də uşaqlar üçün “Ironkids”, 18 yaşdan yuxarı şəxslər üçün isə 5 kilometrlik “Fun Run” qaçışı təşkil olunacaq.
“Ironkids” yarışında 5–8 yaşlı uşaqlar 500 metr, 9–13 yaşlı iştirakçılar 1 kilometr, 14–17 yaşlılar isə 2 kilometr məsafə qət edəcəklər.
