“Azərbaycan Dəmir Yolları” QSC (ADY) Bakı–Tbilisi–Bakı beynəlxalq marşrutu üzrə bilet satış müddətini mərhələli şəkildə artırır.
Bu barədə ADY məlumat yayıb.
Bildirilib ki, yeniliyin məqsədi sərnişin məmnuniyyətini artırmaq, yüksək tələbatı daha səmərəli qarşılamaq və səfərlərin əvvəlcədən planlaşdırılmasını asanlaşdırmaqdır.
Hazırda sərnişinlər üçün 30 gün deyil, 44 günlük bilet satışı açıqdır. Satış müddəti növbəti mərhələlərdə artırılaraq 90 günə çatdırılacaq.
Qeyd olunub ki, bu dəyişiklik sərnişinlərə turizm, işgüzar səfərlər və ailə ziyarətləri ilə bağlı planlarını daha erkən qurmağa imkan verəcək.
ADY bildirir ki, satış müddətinin uzadılması sərnişin tələbatının daha dəqiq proqnozlaşdırılmasına, zərurət yarandıqda əlavə vaqonların qoşulmasına və digər əməliyyat qərarlarının vaxtında qəbul edilməsinə də şərait yaradacaq.
Bundan başqa, Bakı–Tbilisi–Bakı marşrutu üzrə əlavə reysin təşkili istiqamətində işlər davam etdirilir. Əlavə reysin istifadəyə verilməsi üçün Gürcüstan tərəfinin hazırlıqlarını başa çatdırması ilə bağlı texniki və əməliyyat işləri görülür.
