Azad edilmiş ərazilərdə fəaliyyət göstərən məktəblərin sayı yeni tədris ilindən 52-yə çatdırılacaq.
Bunu Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov təhsil işçilərinin sentyabr konfransında deyib.
Onun sözlərinə görə, ötən tədris ilində Qarabağ və Şərqi Zəngəzurda fəaliyyət göstərən təhsil müəssisələrinin sayı 37-yə çatdırılıb.
Eşqi Bağırov bildirib ki, yeni tədris ilindən ölkə üzrə 43 yeni ümumi təhsil müəssisəsinin fəaliyyətə başlaması nəzərdə tutulur.
Direktor qeyd edib ki, son aylarda 1000 təhsil müəssisəsində təmir işləri aparılıb. Bu işlər təxminən 550 min şagirdin təhsil mühitinin yaxşılaşdırılmasına imkan verib.
O həmçinin bildirib ki, ilin sonunadək şagirdlərin istifadəsinə əlavə 40 mindən çox kompüter veriləcək və şagird-kompüter nisbətinin 1:6 səviyyəsinə çatdırılması nəzərdə tutulur.
