Azərbaycanda satışda olan bəzi arıqlama məhsullarının tərkibində insan sağlamlığı üçün ciddi təhlükə yaradan maddələr aşkarlanıb.
Bunu Azərbaycan Qida Təhlükəsizliyi Agentliyinin (AQTA) Qida təhlükəsizliyi şöbəsinin müdiri Validə Sadıxova qurumun altı aylıq fəaliyyətinə həsr olunmuş mətbuat konfransında bildirib.
Onun sözlərinə görə, yoxlamalar zamanı sosial şəbəkələr vasitəsilə qanunsuz satılan arıqlama çayları, qəhvələri, şokoladları və digər məhsullarda təhlükəli maddələr müəyyən edilib. Eyni zamanda, idmançı qidalarının və bioloji aktiv qida əlavələrinin də qanunsuz satışı halları aşkarlanıb.
AQTA rəsmisi bildirib ki, müayinə olunan arıqlama məhsullarının hamısında ürək-damar sistemi üçün ciddi risk yaradan sibutramin maddəsi aşkarlanıb. Bundan əlavə, kişilər üçün nəzərdə tutulan bəzi məcun və şokoladların tərkibində isə etiketdə göstərilməyən sildenafil maddəsi müəyyən edilib.
Agentlik vətəndaşlara sosial şəbəkələrdən mənşəyi məlum olmayan bu cür məhsulları almamağı, əldə etdikləri halda isə onlardan istifadə etməməyi tövsiyə edib.
