ABŞ və İsrailin diplomatik danışıqların nəticəsiz qalacağı təqdirdə, İrana qarşı yeni hərbi əməliyyata başlamaq üçün plan hazırladığı iddia olunur. Əməliyyatın noyabrda keçiriləcək aralıq seçkilərdən dərhal sonra başlaya biləcəyi bildirilir.
Məlumata görə, İsrail Müdafiə Qüvvələrinin Baş Qərargah rəisi, general Eyal Zamir bazar ertəsi ABŞ Silahlı Qüvvələrinin Mərkəzi Komandanlığının (CENTCOM) rəhbəri, admiral Bred Kuperlə mümkün zərbələrdən əvvəl hərəkətləri əlaqələndirmək məqsədilə danışıqlar aparıb.
Mənbələrin iddiasına görə, son anda razılaşma əldə olunmasa, aralıq seçkilərdən qısa müddət sonra genişmiqyaslı bombardmanlarla hərbi əməliyyatlar bərpa edilə bilər. Bildirilir ki, müttəfiqlər İranın nüvə obyektlərini, energetika infrastrukturunu və ali rəhbərliyini hədəf alan bir həftəlik zərbələr kampaniyası hazırlayırlar.
Qeyd edək ki, bunlar Amerika və İsrail rəsmilərinə istinadən yayılan məlumatlardır. Əməliyyatın başlanması ilə bağlı rəsmi qərar barədə məlumat verilməyib.
