ABŞ Prezidenti Donald Tramp İrana qarşı mümkün genişmiqyaslı hərbi əməliyyata hazırlıq məsələlərini müzakirə etmək üçün müşavirə keçirib. Bu barədə Axios nəşri məlumat yayıb.
Məlumata görə, müşavirədən sonra Tramp Tehrana növbəti dəfə sərt xəbərdarlıq edərək bildirib ki, İran danışıqlara qayıtmasa və Vaşinqtonun şərtlərini qəbul etməsə, ABŞ ölkənin enerji infrastrukturu, əsas körpüləri və nəqliyyat obyektlərini hədəfə almağa hazırdır.
Eyni zamanda, ABŞ lideri Hörmüz boğazından keçən gəmilərdən 20 faizlik rüsum alınması ilə bağlı əvvəlki bəyanatını yumşaldıb. Bildirilir ki, Vaşinqton üçün hazırda əsas prioritet Hörmüz boğazında sərbəst gəmiçiliyin və dünya neft bazarında sabitliyin qorunmasıdır.
Məlumatda qeyd olunur ki, ABŞ-nin ötən gecə İran ərazisinə endirdiyi genişmiqyaslı zərbələr atəşkəs elan olunduqdan sonra ən böyük hücumlardan biri hesab edilir və bu, diplomatik həll perspektivlərinin zəiflədiyini göstərir.
Nəşrin qiymətləndirməsinə görə, yaxın günlərdə siyasi razılaşmaya nail olmaq üçün daha bir cəhd göstərilə bilər. Lakin danışıqlar nəticəsiz qalarsa, ABŞ və İran arasında genişmiqyaslı hərbi əməliyyatların yenidən başlanması ehtimalı daha da arta bilər.
