ABŞ Silahlı Qüvvələrinin Mərkəzi Komandanlığı (CENTCOM) İrana qarşı növbəti genişmiqyaslı hərbi əməliyyatın başa çatdığını açıqlayıb.
CENTCOM-un bəyanatında bildirilib ki, ABŞ qüvvələri Hörmüz boğazı və İran sahillərində yerləşən onlarla hərbi obyektə zərbələr endirib.
Əməliyyata qırıcı təyyarələr, pilotsuz uçuş aparatları və ABŞ Hərbi Dəniz Qüvvələrinin gəmiləri cəlb olunub. Zərbələr İranın raket və PUA komplekslərinə, hərbi dəniz qüvvələrinin obyektlərinə, eləcə də sahil müdafiə sistemlərinə yönəlib.
Komandanlığın məlumatına əsasən, yeddi saat davam edən əməliyyatın məqsədi İranın beynəlxalq kommersiya gəmiçiliyinə təhlükə yaratmaq imkanlarını daha da məhdudlaşdırmaq olub.
CENTCOM həmçinin ABŞ qüvvələrinin İran limanlarına gedən və ya oradan çıxan gəmilərə qarşı dəniz blokadasını yenidən tətbiq etdiyini açıqlayıb.
Bəyanatda vurğulanıb ki, ABŞ hərbçiləri yüksək döyüş hazırlığı vəziyyətindədir və növbəti əmrləri yerinə yetirməyə hazırdır.
