ABŞ Dövlət Departamenti Azərbaycanla bağlı “Azadlığa Dəstək Aktı”nın 907-ci düzəlişində nəzərdə tutulan məhdudiyyətlərin tətbiqindən azad etmə müddətinin uzadılması barədə Konqresə bildiriş göndərib.
Xəbər Mərkəzi məlumat verir ki, bu barədə ABŞ Konqresinin rəsmi protokolunda məlumat yer alıb.
Sənədə əsasən, Dövlət Departamenti müvafiq bildirişi iyulun 28-də Senatın Xarici Əlaqələr Komitəsinə, avqustun 10-da isə Nümayəndələr Palatasının Xarici Əlaqələr Komitəsinə təqdim edib.
Qeyd edək ki, 1992-ci ildə qəbul edilən 907-ci düzəliş ABŞ-nin Azərbaycana birbaşa dövlət yardımını məhdudlaşdırır. Sənəddə bu məhdudiyyətin tətbiqindən imtina etmək üçün ABŞ prezidentinə müəyyən hallarda səlahiyyət verilir.
2001-ci ildən etibarən ABŞ prezidentləri bu məhdudiyyətlərin tətbiqini dayandırmaq səlahiyyətindən istifadə edərək 907-ci düzəliş üzrə güzəşti illik əsasda uzadırlar. Bu barədə Konqresə rəsmi bildiriş təqdim olunur.
