İqtisadiyyat Nazirliyi yanında Dövlət Vergi Xidmətinin vəzifəli şəxsi Rüfət Alıyev rüşvət almaqda ittiham olunaraq həbs edilib.
Baş prokuror yanında Korrupsiyaya qarşı Mübarizə Baş İdarəsi və Dövlət Vergi Xidmətinin birgə məlumatına görə, quruma daxil olmuş məlumatlar əsasında aparılan əməliyyat-axtarış tədbirləri nəticəsində cinayət işi başlanılıb.
İstintaqla Dövlət Vergi Xidmətinin 12 saylı Ərazi Vergilər Baş İdarəsinin Operativ vergi nəzarəti idarəsinin əməkdaşı, dövlət vergi müfəttişi Rüfət Alıyevin 2026-cı ilin sentyabrında Gəncədə fəaliyyət göstərən sahibkardan rüşvət almasına əsaslı şübhələr müəyyən edilib.
O, sahibkar barəsində daha az məbləğdə maliyyə sanksiyası tətbiq etmək müqabilində pul almaqda şübhəli bilinir.
Toplanmış sübutlar əsasında Rüfət Alıyevə Cinayət Məcəlləsinin 311.2-ci maddəsi ilə ittiham elan edilib. Məhkəmənin qərarı ilə onun barəsində həbs qətimkan tədbiri seçilib.
