Fransada “Ostin” fırtınası səbəbindən 161 min ev elektrik enerjisiz qalıb.
Məlumata görə, paylayıcı şəbəkələrin operatoru “Enedis” şirkətinin açıqlamasına əsasən, fırtınadan ən çox Bretan bölgəsi zərər çəkib. Burada 128 min ev elektrik enerjisiz qalıb. Pey-de-la-Luar regionunda 19 min, Normandiyada isə 14 min ev təsərrüfatının elektrik təchizatı kəsilib.
Fırtına ölkədə dəmir yolu nəqliyyatında da ciddi problemlər yaradıb. Bretanda bir çox dəmir yolu xəttində hərəkət pozulub və qatarların hərəkətinin günorta saatlarından əvvəl bərpa olunmayacağı gözlənilir. Normandiyada regional qatarların hərəkəti sabaha qədər dayandırılıb.
O-de-Frans regionunda da bir sıra xətlərdə hərəkət fasilələri müşahidə olunur. İl-de-Frans regionunda isə “Transilien” və bir neçə RER xəttində çoxsaylı fasilələrin olacağı gözlənilir.
