Oktyabrın 13-də Bakıda Laos Xalq Demokratik Respublikasının Prezidenti Thonqlun Sisulitin rəsmi qarşılanma mərasimi keçirilib.
Azərbaycan Prezidenti İlham Əliyev Laos Prezidentini qarşılayıb. Hər iki ölkənin dövlət bayraqlarının dalğalandığı meydanda fəxri qarovul dəstəsi düzülüb.
Fəxri qarovul dəstəsinin rəisi Thonqlun Sisulitə raport verib, daha sonra Azərbaycan və Laosun dövlət himnləri səsləndirilib.
Fəxri qarovul dəstəsi hərbi marşın müşayiəti ilə dövlət başçılarının qarşısından keçib.
Daha sonra Azərbaycan nümayəndə heyətinin üzvləri Laos Prezidentinə, Laos nümayəndə heyətinin üzvləri isə İlham Əliyevə təqdim olunublar.
Sonda dövlət başçıları rəsmi foto çəkdiriblər.
