Azərbaycan Prezidenti İlham Əliyev oktyabrın 12-də İranın daxili işlər naziri İsgəndər Momenini qəbul edib.
Görüşdə dövlət başçısı Azərbaycanla İran arasında təhlükəsizlik və ictimai asayişin qorunması sahələrində də yüksək səviyyəli əməkdaşlığın vacibliyini vurğulayıb. İlham Əliyev İran Daxili İşlər Nazirliyinin nümayəndə heyətinin səfərinin uğurlu olacağına əminliyini bildirib və bunu ikitərəfli təmasların davamı kimi qiymətləndirib. O, bir müddət əvvəl Azərbaycan nümayəndə heyətinin İrana səfər etdiyini və orada mühüm görüşlər keçirdiyini xatırladıb.
İsgəndər Momeni qəbul üçün Prezident İlham Əliyevə minnətdarlığını bildirib və Azərbaycana səfərindən məmnunluğunu ifadə edib. O, İran Prezidenti Məsud Pezeşkianın salamlarını dövlət başçısına çatdırıb və İran liderinin İlham Əliyevlə son dövrlərdə keçirdiyi görüşləri səmimiyyətlə xatırladığını qeyd edib.
İlham Əliyev salamlara görə təşəkkür edib və öz salamlarını Məsud Pezeşkiana çatdırmağı xahiş edib. Prezident İranlı həmkarı ilə son dövrlərdə tez-tez görüşdüyünü, bir neçə gün əvvəl Türkmənistanda da onunla bir araya gəldiyini bildirib.
İsgəndər Momeni İran Prezidentinin iki ölkənin müvafiq qurumları arasında münasibətlərin inkişafına xüsusi əhəmiyyət verdiyini vurğulayıb. O, Azərbaycanın İranda müxtəlif vaxtlarda baş vermiş hadisələr, o cümlədən güclü zəlzələlər və meşə yanğınları zamanı göstərdiyi humanitar yardım və dəstəyə görə təşəkkürünü ifadə edib.
Görüşdə İranın daxili işlər naziri regionda gərginliyin aradan qaldırılması istiqamətində aparılan danışıqlar prosesi barədə məlumat verib. İlham Əliyev Yaxın Şərqdə mövcud gərginliyin danışıqlar yolu ilə həll olunacağına ümidvar olduğunu bildirib.
Söhbət zamanı iki ölkənin müvafiq qurumları arasında əməkdaşlığın perspektivləri və qarşılıqlı maraq doğuran məsələlər də müzakirə olunub.
