ABŞ Prezidenti Donald Tramp Ukraynada yeni prezident seçilməsinin vaxtı çatdığını bildirib.
Ağ Evin qarşısında jurnalistlərlə söhbətində Tramp Ukrayna Prezidenti Volodimir Zelenskini Rusiya-Ukrayna münaqişəsini həll etmək üçün yaranmış imkanlardan istifadə etməməkdə ittiham edib.
“Düşünürəm ki, Ukraynanın yeni prezident seçmək vaxtı çatıb… Mən sövdələşmə bağlaya biləcək yeni bir lider tapmağı təklif edirəm. Çünki o, (Zelenski – red.) çoxlu sövdələşmələr bağlaya bilərdi, lakin nədənsə bunu heç vaxt etmədi”, – Tramp bildirib.
ABŞ lideri həmçinin Zelenskinin Rusiyanın neft emalı zavodlarına zərbələr endirməsini tənqid edib. Onun sözlərinə görə, bu hücumlar dizel yanacağının tədarükündə problemlərə və qlobal miqyasda yanacaq qıtlığına səbəb ola bilər.
“Biz dedik ki, bircə neft emalı zavodlarına zərbə endirməyin, axı Rusiya bütün dünya üzrə dizel yanacağının əhəmiyyətli hissəsini tədarük edir, dizel yanacağına zərbə endirməyin, çünki bu, ciddi problemə, onun kəskin qıtlığına gətirib çıxaracaq”. Bəs o nə edir? Gedir və dizel yanacağına zərbələr endirir. O belə hərəkət edə bilməz, çünki bizim qlobal problemimiz var və bu problem dizel yanacağı istehsal edən neft emalı zavodlarının çatışmazlığından qaynaqlanır”, – Tramp deyib.
Daha əvvəl “Financial Times” qəzeti mənbələrə istinadən ABŞ-ın Rusiyanın neft emalı zavodlarına zərbələrin davam edəcəyi təqdirdə Ukraynanı mühüm kəşfiyyat məlumatlarının ötürülməsini dayandırmaqla hədələdiyini yazıb.
