ABŞ Prezidenti Donald Tramp Ukraynadakı müharibənin sona yaxınlaşdığını düşünür.
Tramp bunu Merilend ştatının Baltimor şəhəri yaxınlığındakı Sparrows Point gəmiqayırma zavodunda tərəfdarları ilə görüşü zamanı deyib.
“İstəyirsiniz inanın, istəyirsiniz inanmayın, amma bu, həqiqətən də sona yaxınlaşır. Baxmayaraq ki, elə görünmür… Düşünürdüm ki, bu, mənim üçün ən asan məsələ olacaq. Mən səkkiz müharibənin başa çatmasına nail olmuşam. Bu da kifayət qədər tezliklə baş verəcək”, – deyə Tramp bildirib.
ABŞ Prezidenti Ukraynadakı müharibənin başa çatması istiqamətində çalışdığını da qeyd edib.
Tramp İranla bağlı vəziyyətə də toxunub. O bildirib ki, ABŞ-ın İran neftinə ehtiyacı yoxdur və bu neftə “başqalarının” ehtiyacı var.
“Hörmüz boğazı ABŞ Hərbi Dəniz Qüvvələrinə və ABŞ-a məxsusdur. Hazırda vəziyyət belədir. Bununla belə, bizim onların neftinə ehtiyacımız yoxdur. Onların neftinə başqalarının, həm də çox ehtiyacı var. Amma biz onun ixracını təmin edirik. Həm də bunu rekord səviyyədə həyata keçiririk”, – Tramp əlavə edib.
ABŞ Prezidenti həmçinin Vaşinqtonun Tehranın nüvə silahına sahib olmasının qarşısının alınması məsələsini həll etdiyini vurğulayıb.
“Bu, heç vaxt baş verməyəcək, heç vaxt. Bu məsələ artıq həll olunub”, – deyə Tramp bildirib.
