Azərbaycan Prezidenti İlham Əliyev oktyabrın 3-də Beynəlxalq Cüdo Federasiyasının prezidenti Ladislau-Marius Vizeri qəbul edib.
Dövlət başçısı Azərbaycanda cüdonun inkişafına, həmçinin Bakıda bu idman növü üzrə dünya çempionatının keçirilməsinə göstərdiyi dəstəyə görə Ladislau-Marius Vizerə minnətdarlığını bildirib. Prezident İlham Əliyev artıq ikinci dəfə Azərbaycanın bu mötəbər idman tədbirinə ev sahibliyi etdiyini deyib və çempionatın yüksək səviyyədə keçiriləcəyinə əminliyini ifadə edib.
Dövlət başçısı cüdonun Azərbaycanda məşhur və ən çox medal gətirən idman növlərindən biri olduğunu qeyd edib, bu xüsusda cüdoçularımızın mötəbər yarışlarda qazandıqları medalları vurğulayıb.
Azərbaycan Prezidenti idman sahəsində əldə olunan uğurlarda Bakı ilə yanaşı, regionlarda yaradılmış müasir idman infrastrukturunun da roluna toxunub.
Ladislau-Marius Vizer qəbul üçün və Bakıda cüdo üzrə dünya çempionatının yüksək səviyyədə təşkilinə görə dövlətimizin başçısına minnətdarlığını bildirib. O, müxtəlif idman tədbirlərində cüdoçularımızın qazandıqları medallar münasibətilə təbriklərini çatdırıb və Azərbaycanda cüdonun inkişafına göstərdiyi dəstəyə görə Prezident İlham Əliyevə təşəkkür edib.
Görüşdə Azərbaycanın Beynəlxalq Cüdo Federasiyasının fəal üzvü olduğu məmnunluqla qeyd edilib, qurumla Azərbaycan Cüdo Federasiyası arasında həyata keçirilən əməkdaşlığın perspektivləri barədə fikir mübadiləsi aparılıb.
Sonda Prezident İlham Əliyev Ladislau-Marius Vizerə “Dostluq” ordenini təqdim edib.
Qeyd edək ki, Ladislau-Marius Vizer ölkəmizdə və beynəlxalq səviyyədə cüdonun inkişafı sahəsində səmərəli fəaliyyətinə və verdiyi töhfəyə görə Azərbaycan Prezidentinin Sərəncamı ilə bu ordenlə təltif olunub.
