Pakistanın Lahor şəhərində 23 yaşlı Azərbaycan vətəndaşı Diana Bağıyevaya qarşı qrup halında cinsi zorakılıq törədildiyi bildirilir.
Məlumata görə, Diana Bağıyeva biznes məqsədilə təxminən iki həftə əvvəl Pakistana gedib. Hadisə günü iki qadın onu şam yeməyinə dəvət edib. Daha sonra onların yanına üç kişi gəlib. Şübhəlilər azərbaycanlı qadını evinə aparacaqlarını bildirərək naməlum ünvana aparıblar.
İddiaya görə, burada ona huşunu zəiflədən maddə ola biləcəyi ehtimal edilən içki verilib. Daha sonra üç kişi qadına qarşı cinsi zorakılıq törədib. Zorakılığın gecə boyu davam etdiyi bildirilir.
Şübhəlilər daha sonra Diana Bağıyevanı hava limanının yaxınlığında avtomobildən düşürərək ərazidən uzaqlaşıblar. Onun iki bahalı mobil telefonunun da götürüldüyü bildirilir.
Polis hadisə ilə bağlı şübhəlilərin kimliyini müəyyənləşdirib və cinayətdə istifadə olunduğu ehtimal edilən avtomobili müsadirə edib. Araşdırmalar davam etdirilir.
Məlumata görə, hadisə ilə bağlı sosial şəbəkələrdə də müxtəlif iddialar yayılıb. Həmin iddialarda şübhəlilərdən biri və hadisənin digər təfərrüatları barədə məlumatlar yer alıb. Bu məlumatların araşdırma çərçivəsində yoxlanıldığı bildirilir.
