“Birliyin Gücü – 2026” birgə hərbi təlimi sülhün və sabitliyin təmin olunmasına töhfə verir.
Azərbaycanın müdafiə naziri, general-polkovnik Zakir Həsənov bildirib ki, belə təlimlər şəxsi heyətin peşəkarlığının artırılmasına və hərbçilər arasında təcrübə mübadiləsinə imkan yaradır.
Azərbaycan, Türkiyə və Özbəkistan hərbçilərinin iştirak etdiyi təlimdə İran, Slovakiya, Qırğızıstan, Tacikistan, Gürcüstan, Pakistan, Türkmənistan, Serbiya və Birləşmiş Ərəb Əmirlikləri müşahidəçi qismində iştirak edir.
Üç mərhələdən ibarət təlim “Qızılqaya” və “Qarabağlar” təlim mərkəzlərində, həmçinin Xəzər dənizinin Azərbaycana aid akvatoriyasında yerləşən “Böyük Zirə” təlim rayonunda keçirilib.
Təlim zamanı iştirakçılar hibrid təhdidlərə və terror fəaliyyətlərinə qarşı mübarizə, yaşayış məntəqələrində antiterror əməliyyatlarının keçirilməsi, müştərək planlaşdırma və qanunsuz silahlı qruplaşmaların zərərsizləşdirilməsi üzrə tapşırıqları birgə icra ediblər.
Təlimin əsas məqsədləri hərbi əməkdaşlığın genişləndirilməsi, şəxsi heyətin praktiki bacarıqlarının təkmilləşdirilməsi, təcrübə mübadiləsi və bölmələr arasında qarşılıqlı uzlaşmanın gücləndirilməsidir.
