İtaliya son hərbçilərini İraqdan çıxararaq bu ölkədə 12 illik hərbi mövcudluğuna son qoyub. Bu barədə İtaliya Müdafiə Nazirliyinin bəyanatında bildirilib.
Roma 2026-cı ilin martına qədər İraq Kürdüstanındakı hərbi bazasına gecə saatlarında endirilən hava zərbəsindən sonra hərbi personalının böyük hissəsini ölkədən çıxarmışdı.
İtaliya hərbçiləri İŞİD-ə qarşı ABŞ-nin rəhbərlik etdiyi “Sarsılmaz qətiyyət” əməliyyatında, həmçinin NATO-nun İraqdakı missiyasında iştirak ediblər. NATO missiyası İraq təhlükəsizlik qüvvələrinin hazırlanması və onların imkanlarının artırılmasına yönəlmiş konsultativ xarakter daşıyıb.
İtaliya Müdafiə Nazirliyinin məlumatına görə, İtaliya və NATO qüvvələrinin bölgədən çıxarılmasının sentyabrın 30-dək başa çatdırılması ilə bağlı yerli hakimiyyət orqanları ilə razılaşma əldə olunub.
İtaliyanın müdafiə naziri Qvido Krosetto bildirib ki, qoşunların çıxarılmasının başa çatması İraqın öz təhlükəsizliyinin təmin edilməsində daha çox məsuliyyət daşıması deməkdir.
