İran parlamentində ölkənin “Nüvə silahının yayılmaması haqqında” müqavilədən (NPT) çıxmasını nəzərdə tutan qanun layihəsi hazırlanıb.
İran parlamenti sədrinin müavini Əli Nikzad bildirib ki, təşəbbüs hazırda onun beynəlxalq nəticələri də nəzərə alınmaqla araşdırılır.
Onun sözlərinə görə, sənəd “fövqəladə əhəmiyyətli” statusu ilə plenar iclasa çıxarılacaq və deputatlar həmin gün layihəyə baxmalı olacaqlar.
Nikzad xatırladıb ki, İran ötən ilin sentyabrında Beynəlxalq Atom Enerjisi Agentliyi (BAEA) ilə əməkdaşlığı dayandırıb. O, BAEA-nın baş direktoru Rafael Qrossini tənqid edərək, onun İranla bağlı yoxlamalardan sonra ölkənin əleyhinə hesabat hazırladığını bildirib.
Parlament sədrinin müavini ötən il qəbul edilən qərarın İranın xeyrinə olduğunu deyib və BAEA-nın İranın nüvə enerjisi sahəsində ölkəyə yardım göstərəcəyinə ümid olmadığını bildirib.
