Azərbaycan Cənubi Qafqaz regionunda ABŞ-nin etibarlı və etimada layiq tərəfdaşıdır.
Bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “Newsmax”a müsahibəsində bildirib.
H.Hacıyev ABŞ Prezidenti Donald Trampın Azərbaycan və Ermənistan arasında sülhün əldə olunması istiqamətindəki səylərinin Cənubi Qafqazın strateji mənzərəsini dəyişdirdiyini və Bakı-Vaşinqton münasibətlərində yeni mərhələnin əsasını qoyduğunu deyib.
“Prezident Tramp və onun hakimiyyətə gəlişi ABŞ ilə Azərbaycan arasındakı əməkdaşlıq və tərəfdaşlığı tamamilə dəyişdi. Və ən əsası – sülhdür. O, Cənubi Qafqaz regionuna sülh gətirdi. Prezident Trampın liderliyi ona bu prosesdə öz siyasi çəkisindən istifadə etməyə və Ermənistanla Azərbaycanı sülhə gətirməyə imkan verdi”, – H.Hacıyev bildirib.
Prezidentin köməkçisi Cənubi Qafqaz üçün mühüm tarix kimi 2025-ci il avqustun 8-ni də qeyd edib. Həmin gün Ağ Evdə Donald Trampın iştirakı ilə Azərbaycan Prezidenti İlham Əliyev və Ermənistanın Baş naziri Nikol Paşinyan Azərbaycan-Ermənistan münasibətlərinin normallaşdırılması istiqamətində birgə bəyannamə imzalayıblar.
H.Hacıyev bildirib ki, Trampın şəxsi iştirakı beynəlxalq diplomatiyanın uzun illər ərzində əldə edə bilmədiyi nəticəyə nail olunmasına imkan verib.
Azərbaycan-ABŞ münasibətlərindən danışan H.Hacıyev iki ölkə arasında strateji tərəfdaşlıqda “yeni dövr”ün başladığını vurğulayıb.
“Prezident Donald Tramp və Prezident İlham Əliyev Birləşmiş Ştatlar ilə Azərbaycan arasında strateji tərəfdaşlıqda yeni dövr təklif ediblər və ölkələr arasında strateji tərəfdaşlığa dair yeni memorandumun hazırlanması barədə razılığa gəliblər”, – deyə o bildirib.
H.Hacıyev həmçinin ABŞ-nin vitse-prezidenti Cey Di Vensin Azərbaycana səfəri zamanı strateji tərəfdaşlıqla bağlı sənədin imzalanmasını qeyd edib.
“ABŞ və Azərbaycan arasında strateji dostluq, əməkdaşlıq və tərəfdaşlıq möhkəm əsasa malikdir və bunlar geosiyasi əhəmiyyətə malik olan regionda inkişaf etməyə davam edəcək. Azərbaycan Birləşmiş Ştatların etibarlı və etimada layiq tərəfdaşı olaraq qalır”, – H.Hacıyev vurğulayıb.
