Azərbaycan Prezidenti İlham Əliyev sentyabrın 15-də Türkiyənin xarici işlər naziri Hakan Fidanı qəbul edib.
Hakan Fidan Türkiyə Prezidenti Rəcəb Tayyib Ərdoğanın salamlarını dövlət başçısına çatdırıb. İlham Əliyev salamlarına görə təşəkkür edib və öz salamlarını da Rəcəb Tayyib Ərdoğana çatdırmağı xahiş edib.
Görüşdə Azərbaycan-Türkiyə qardaşlıq və strateji müttəfiqlik münasibətlərinin bütün istiqamətlər üzrə uğurla inkişaf etdiyi vurğulanıb. Əməkdaşlığın “bir millət, iki dövlət” prinsipi əsasında daha da möhkəmləndiyi qeyd olunub.
Enerji sahəsində əməkdaşlığın əhəmiyyətinə toxunulub, alternativ enerji istiqamətində beynəlxalq bazarlara yeni çıxış imkanları ilə bağlı fikir mübadiləsi aparılıb.
Həmçinin Azərbaycan və Türkiyənin Avropa ilə Asiya arasında mühüm logistika körpüsü olduğu vurğulanıb və beynəlxalq təşkilatlar çərçivəsində fəaliyyətin əlaqələndirilməsinin vacibliyi qeyd edilib.
Görüşdə ikitərəfli əlaqələrin perspektivləri, regional məsələlər və qarşılıqlı maraq doğuran digər mövzular ətrafında fikir mübadiləsi aparılıb.
