Azərbaycanda 2026-cı ilin yanvar-avqust aylarında qanunsuz dövriyyədən 208 milyon 472 min manat dəyərində 6 ton 994 kq 958,417 qram narkotik vasitə və psixotrop maddə çıxarılıb.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının məlumatına görə, hesabat dövründə narkotiklərlə bağlı 5 561 cinayət faktı aşkarlanıb.
Onlardan 1 402-si narkotik vasitələrin qanunsuz satışı, 4 033-ü qanunsuz əldə etmə və saxlama, 123-ü narkotik tərkibli bitkilərin qanunsuz əkilib-becərilməsi ilə bağlı olub.
Dövriyyədən çıxarılan narkotiklərin əsas hissəsini 5 ton 928 kq 804,897 qram marixuana təşkil edib. Həmçinin 376 kq 894,303 qram heroin, 139 kq 795,918 qram tiryək, 247 kq 630,147 qram həşiş, 15,849 qram kokain və digər narkotik vasitələr müsadirə olunub.
Bundan əlavə, hesabat dövründə Daxili İşlər Nazirliyinin təşkilatçılığı və digər aidiyyəti qurumların nümayəndələrinin iştirakı ilə 1 447,5 hektar ərazidə yabanı halda bitən 4 milyon 124 min 541 ədəd narkotik tərkibli bitki aşkarlanaraq məhv edilib.
