ABŞ-nin Florida ştatında yerləşən Mayami Beynəlxalq Hava Limanında “Boeing 767-300” tipli yük təyyarəsinin uçuş-enmə zolağından çıxaraq qəzaya uğraması nəticəsində azı beş nəfər ölüb.
Hadisə yerli vaxtla sentyabrın 6-da saat 14:00 radələrində baş verib. “Amazon Air” üçün fəaliyyət göstərən və “21 Air” tərəfindən idarə olunan “Prime Air” yük təyyarəsi Puerto-Rikonun San-Xuan şəhərindən Mayamiyə uçub.
Eniş zamanı təyyarə uçuş-enmə zolağını keçərək bir neçə avtomobilə çırpılıb və daha sonra yanğın baş verib.
Qəza nəticəsində beş nəfər ölüb, daha beş nəfər xəsarət alıb. Yaralılardan üçünün vəziyyətinin ağır olduğu bildirilir. Pilot və ikinci pilot da təyyarənin içərisində sıxılmış vəziyyətdə qalıb və xilasetmə əməliyyatı ilə çıxarılıb.
Hadisə ilə bağlı ABŞ Milli Nəqliyyat Təhlükəsizliyi Şurası (NTSB) araşdırma aparır. Qəzanın səbəbləri hələlik məlum deyil.
