Türkiyə Xarici İşlər Nazirliyi (XİN) Avropa Parlamentinin 2027-ci il Avropa İttifaqı (Aİ) büdcəsinə dair rəyi ilə bağlı etirazını bildirib.
Türkiyə XİN-in məlumatına görə, Avropa Parlamenti Qadın Hüquqları və Gender Bərabərliyi Komitəsinin büdcə ilə bağlı rəyində Kiprin yunan tərəfi tərəfindən Türk Silahlı Qüvvələrinə qarşı ittihamların əks etdirilməsi məqsədilə inşa ediləcəyi bildirilən abidəyə vəsait ayrılması tövsiyə edilib.
Türkiyə XİN bəyan edib ki, 1974-cü ildə keçirilən Kipr Sülh Əməliyyatı nəticəsində adanın türk sakinlərinin məhv edilməsinin qarşısı alınıb və adada uzunmüddətli sülh təmin edilib.
Nazirlik yunan tərəfinin irəli sürdüyü iddiaların tarixi hadisələri təhrif etdiyini və siyasiləşdirdiyini bildirib.
“Aİ qurumlarının Kipr məsələsinin həllinə töhfə vermək əvəzinə, qərəzsizlik və ədalət prinsiplərindən uzaqlaşaraq yunan tərəfinin təbliğatına alət olması icmalararası etimadı daha da zədələyir.
Aİ rəsmilərinə atdıqları hər addımla Türkiyəni Aİ-dən uzaqlaşdırmağı hədəfləyən dairələrin vasitəsinə çevrilməmələri ilə bağlı çağırış edirik”, – Türkiyə XİN-in bəyanatında qeyd olunub.
