Azərbaycanın İnsan Hüquqları üzrə Müvəkkili (Ombudsman) Səbinə Əliyeva 30 Avqust – Beynəlxalq Məcburi Yoxaçıxma Qurbanları Günü ilə əlaqədar bəyanat yayıb.
Bəyanatda qeyd olunub ki, Birinci Qarabağ müharibəsi nəticəsində 4 mindən artıq Azərbaycan vətəndaşı itkin düşmüş şəxs kimi qeydiyyata alınıb.
Bildirilir ki, İkinci Qarabağ müharibəsindən və lokal xarakterli antiterror əməliyyatından sonra azad edilmiş ərazilərdə 32 kütləvi məzarlıq aşkar edilib. Həmin məzarlıqlarda aparılan axtarış, ekshumasiya, məhkəmə-tibbi ekspertiza və identifikasiya tədbirləri nəticəsində 328 nəfərin şəxsiyyəti müəyyənləşdirilib, 250 nəfərin qalıqları isə ailələrinə təhvil verilərək dəfn olunub.
Bəyanatda vurğulanıb ki, hazırda 3 682 Azərbaycan vətəndaşının taleyi naməlum olaraq qalır.
Ombudsman bildirib ki, itkin düşmüş şəxslərin taleyinin müəyyənləşdirilməsi üçün kütləvi məzarlıqlar barədə məlumatların paylaşılması, DNT və məhkəmə-tibbi ekspertizası sahəsində əməkdaşlığın genişləndirilməsi və beynəlxalq humanitar əməkdaşlığın gücləndirilməsi zəruridir.
Bəyanatda qeyd edilib ki, zaman keçdikcə maddi sübutların itməsi, şahidlərin sayının azalması və məlumatların məhdudlaşması itkin şəxslərin taleyinin müəyyənləşdirilməsi prosesini çətinləşdirir.
