Dövlət Sərhəd Xidməti (DSX) Heydər Əliyev Beynəlxalq Hava Limanında “Elektron qapı sərhəd nəzarəti sistemi”ni istifadəyə verib.
Yeni sistem Azərbaycan Respublikasının 18 yaşı tamam olmuş vətəndaşlarına sərhəd nəzarətindən daha sürətli və rahat keçməyə imkan verir.
Elektron qapı vasitəsilə prosesin əsas mərhələləri avtomatlaşdırılıb. Sərnişin şəxsiyyət sənədini xüsusi oxutma qurğusuna təqdim etdikdən sonra sənəddəki məlumatlar sistem tərəfindən avtomatik oxunur, zəruri yoxlamalar aparılır və biometrik məlumatlar əsasında şəxsin eyniləşdirilməsi həyata keçirilir.
Məlumatların uyğunluğu təsdiqləndikdə elektron qapı avtomatik açılır. Sərhəd nəzarətindən keçid prosesi təxminən 20 saniyə ərzində tamamlanır.
Sistemin tətbiqi sərnişinlərin gözləmə müddətinin azaldılmasına, nəzarət prosedurlarının çevikliyinin və səmərəliliyinin artırılmasına, eləcə də insan amilinin minimuma endirilməsinə imkan yaradacaq.
“Elektron qapı sərhəd nəzarəti sistemi” ilkin mərhələdə hava limanının ölkəyə gəlmə zalında tətbiq olunub.
Növbəti mərhələdə sistemin digər dövlət sərhədindən buraxılış məntəqələrində də istifadəyə verilməsi planlaşdırılır.
