Dövlət Sərhəd Xidmətinin (DSX) Sərhəd Qoşunlarının “Horadiz” sərhəd dəstəsinin xidməti ərazisində İrandan Azərbaycana narkotik vasitələrin və psixotrop maddələrin qaçaqmalçılıq yolu ilə keçirilməsinin qarşısı alınıb.
Sərhəd axtarışı və əməliyyat tədbirləri nəticəsində avqustun 21-də 26 kiloqram 5 qram narkotik vasitə və 1 000 ədəd Metadon M-40 həbi keçirməyə cəhd edən bir Azərbaycan vətəndaşı saxlanılıb.
Növbəti gün, avqustun 22-də isə daha üç Azərbaycan vətəndaşı 29 kiloqram 100 qram narkotik vasitəni ölkə ərazisinə keçirməyə cəhd edərkən tutulub.
Beləliklə, iki əməliyyat zamanı ümumilikdə 55 kiloqram 105 qram narkotik vasitə və 1 000 ədəd Metadon M-40 həbi qanunsuz dövriyyəyə buraxılmadan götürülüb.
Hər iki fakt üzrə əməliyyat-istintaq tədbirləri davam etdirilir.
