Dövlət İmtahan Mərkəzi (DİM) 2026/2027-ci tədris ili üzrə ali təhsil müəssisələrinin magistraturalarında boş qalan yerlərə qəbul üçün ixtisaslaşma seçimi elan edib.
İxtisaslaşma seçimi 30 avqust saat 23:59-dək davam edəcək.
Müsabiqədə 15 fevral, 17 may və 14 iyunda keçirilmiş magistratura qəbul imtahanlarının nəticələrinə əsasən müsabiqə şərtlərini ödəyən və ixtisaslaşma seçiminə buraxılan bakalavrlar iştirak edə bilərlər.
Bakalavrlar seçim zamanı 20-dək ixtisaslaşma kodu qeyd edə bilərlər. Bunun üçün DİM-in internet saytında müvafiq elektron ərizəni dolduraraq təsdiqləmək tələb olunur.
Qeyd edək ki, əvvəlki müsabiqə nəticəsində magistraturaya qəbul olunan, lakin müəyyən edilmiş müddətdə təhsil müəssisəsində qeydiyyatdan keçməyən bakalavrlar boş qalan yerlər üzrə keçirilən müsabiqədə iştirak edə bilməzlər.
Boş qalan plan yerlərinin olduğu ixtisaslaşmaların siyahısı “Magistr” jurnalının 6-cı sayında dərc olunub.
