Dövlət Təhlükəsizliyi Xidməti (DTX) tərəfindən həyata keçirilən antiterror və əməliyyat-axtarış tədbirləri çərçivəsində 2009-cu ildən beynəlxalq axtarışda olan Namiq Ağalarov saxlanılaraq Azərbaycana gətirilib və istintaqa cəlb olunub.
İstintaq materiallarına əsasən, Namiq Ağalarov 2008-2009-cu illərdə Əfqanıstan, Pakistan və digər ölkələrdə qanunsuz silahlı birləşmələrin tərkibində fəaliyyət göstərib.
O, BMT mandatı ilə fəaliyyət göstərən Beynəlxalq Təhlükəsizliyə Yardım Qüvvələrinin şəxsi heyətinə qarşı silahlı pusquların qurulmasında, məsafədən idarə olunan partlayıcı qurğulardan istifadə edilməsində, həmçinin beynəlxalq təşkilatların nümayəndələrinə, müxtəlif ölkələrin vətəndaşlarına və logistika şəbəkələrinə qarşı silahlı hücumların təşkilində iştirak etməkdə ittiham olunur.
Məlumata görə, Namiq Ağalarov məsuliyyətdən yayınmaq məqsədilə ötən illər ərzində müxtəlif adlarla ayrı-ayrı ölkələrdə gizlənib. Onun eyni zamanda cihad və radikal dini təbliğat fəaliyyəti ilə məşğul olduğuna dair məlumatlar da var.
