Azərbaycan və Ermənistan son bir il ərzində sülhü hər iki ölkənin xalqları üçün hiss olunan reallığa çevirmək istiqamətində mühüm addımlar atıblar.
Fransa Xarici İşlər Nazirliyinin mətbuat katibi Paskal Konfavrönün 2025-ci il avqustun 8-də keçirilmiş Vaşinqton sammitinin ildönümü ilə bağlı yaydığı bəyanatda bildirilib ki, ötən il ərzində Azərbaycan və Ermənistanın hakimiyyət orqanları münasibətlərin normallaşdırılması istiqamətində mühüm və cəsarətli addımlar atıblar.
Fransa XİN rəsmisi qeyd edib ki, Paris Cənubi Qafqazın tamhüquqlu əməkdaşlıq məkanına və Avropa ilə Asiya arasında birləşdirici halqaya çevrilməsi üçün prosesin davam etdiriləcəyinə ümid edir.
Bunun üçün Azərbaycan və Ermənistan arasında sülh müqaviləsinin imzalanması və ratifikasiyası, sərhədlərin açılması və regional nəqliyyat əlaqələrinin inkişafının vacib olduğu vurğulanıb.
Fransa Azərbaycanın və Ermənistanın suverenliyinə və ərazi bütövlüyünə tam hörmət etməklə sülh prosesinə dəstəyini davam etdirəcəyini bildirib.
