Türkiyədə müğənni Haluk Leventin təsisçisi olduğu “Ahbap” dərnəyi ilə bağlı aparılan araşdırma çərçivəsində 2023-cü il Kahramanmaraş zəlzələlərindən sonra toplanan ianələrin yoxlanılmasına başlanılıb.
Türkiyə KİV-inin məlumatına görə, Maliyyə Cinayətləri İstintaq Şurası (MASAK) tərəfindən aparılan araşdırmada incəsənət, idman və iş dünyasının tanınmış simalarının etdiyi ianələr təhlil edilib. İlkin nəticələrə əsasən, 36 məşhurun dərnəyə ümumilikdə 14 milyon türk lirəsindən çox vəsait köçürdüyü müəyyən olunub.
Araşdırmaya görə, Tarkan, Ajda Pekkan, Sibel Can, aktyorlar Ebru Şahin və Barış Arduç, eləcə də iş adamı Nevzat Aydın zəlzələ qurbanları üçün “Ahbap” dərnəyinə bir milyon türk lirəsi ianə ediblər.
Tolqa Çevik, Ebru Gündeş, Somer Sivrioğlu, Halit Ergenç və Hasan Can Kaya da müxtəlif məbləğlərdə ianə edən tanınmış şəxslər arasında yer alıb.
İstintaq çərçivəsində “Ahbap” dərnəyinin mühasibat sənədləri də yoxlanılır. Məqsəd toplanan ianələrin hansı istiqamətlərə və necə xərcləndiyini müəyyən etməkdir.
