Müxtəlif xarici ölkələrin informasiya sistemlərinə kiberhücumlar təşkil etməkdə şübhəli bilinən 23 yaşlı Ramil Feyziyev və 22 yaşlı Elçin Abdullazadə saxlanılıblar.
Daxili İşlər Nazirliyinin məlumatına görə, Kibercinayətkarlıqla Mübarizə Baş İdarəsində aparılan araşdırmalar zamanı onların xarici dövlətlərə məxsus çoxsaylı veb-saytların serverlərinə qanunsuz müdaxilə edərək idarəetmə panellərinə icazəsiz giriş əldə etdikləri müəyyən edilib. Araşdırma zamanı müəyyən edilib ki, R.Feyziyev ümumilikdə 2300, E.Abdullazadə isə 179 xarici veb-sayta qanunsuz müdaxilə ediblər.
İstintaqla məlum olub ki, şübhəlilər məxfi məlumatları ələ keçirdikdən sonra internet resurslarının əsas səhifələrində dəyişikliklər edib, öz proqram təminatlarını yerləşdirərək həmin sistemlərə nəzarəti ələ alıblar. Daha sonra isə ələ keçirdikləri idarəetmə panellərinin satışını təşkil ediblər.
Araşdırma zamanı müəyyən olunub ki, Ramil Feyziyev 2300, Elçin Abdullazadə isə 179 xarici veb-sayta qanunsuz müdaxilə edib.
Faktla bağlı Cinayət Məcəlləsinin müvafiq maddəsi ilə cinayət işi başlanılıb. Müxtəlif ölkələrin hüquq-mühafizə orqanları ilə əməkdaşlıq çərçivəsində əməliyyat-istintaq tədbirləri davam etdirilir.
