Dövlət İmtahan Mərkəzi (DİM) ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün avqustun 4-də keçirilən qabiliyyət imtahanının nəticələrini elan edib.
DİM-in məlumatına görə, imtahanda iştirak hüququ qazanan 827 abituriyentdən 189-u imtahana qatılmayıb. İştirak edənlərdən 543 nəfər məqbul qiymət alıb.
Məqbul qiymət alan abituriyentlər avqustun 12-dən 19-dək aparılacaq ixtisas seçimi zamanı jurnalistika ixtisasını seçə biləcəklər.
Qeyd edilib ki, bu il ilk dəfə olaraq abituriyentlər inşanı kompüterdə elektron formada yazıblar. Bu yenilik mətnin redaktəsini asanlaşdırmaqla yanaşı, qiymətləndirmə prosesinin daha səmərəli təşkilinə və əl yazısı ilə bağlı çətinliklərin aradan qaldırılmasına imkan yaradıb.
Nəticələrlə bağlı Apellyasiya Komissiyasına müraciət etmək istəyənlər 10-11 avqust tarixlərində saat 10:00-dan 17:00-dək DİM-in əsas inzibati binasında və ya regional bölmələrində ərizə ilə müraciət edə bilərlər.
