Fransada 116 min hektardan çox ərazinin yanması fonunda solçu “Əyilməz Fransa” (LFI) partiyasının deputatı Hadryən Klue hökuməti meşə yanğınları ilə mübarizədə uğursuzluqda ittiham edib.
Deputat Milli Assambleyanın fövqəladə sessiyasının çağırılmasını tələb edərək bildirib ki, hökumət mülki müdafiə xidmətinin imkanlarını zəiflədib və təhlükəsizlik qüvvələrinin real imkanları barədə ictimaiyyətə yanlış məlumat verib. Onun fikrincə, vəziyyət əlavə maliyyə ayrılması üçün dövlət büdcəsinə təcili dəyişiklik edilməsini zəruri edir.
Hadryən Klue parlamentin qısa müddətdə toplanmasını, yanğınsöndürənlərlə məsləhətləşmələrin aparılmasını və onların yerüstü və hava texnikası ilə təmin olunmasını təklif edib. O, həmçinin A400M hərbi nəqliyyat təyyarələri üçün suatma sistemlərinin sifariş edilməsini vacib sayıb.
Deputat hökuməti “Canadair” yanğınsöndürən təyyarələrinin alınmasından imtina etməkdə və gələn il üçün “Super Puma” helikopterlərinin alınmasını planlaşdırmamaqda da tənqid edib. Onun sözlərinə görə, bəzi yanğınsöndürənlərin istifadə etdiyi qoruyucu başlıqlar təhlükəli maddələrdən kifayət qədər müdafiə etmir.
Klue əlavə edib ki, yanğınlarla mübarizəyə ayrılan vəsait xərc deyil, gələcəyə sərmayədir. O, bu məqsədlə sərvət vergisindən əldə olunan gəlirlərin bir hissəsinin yönəldilməsini təklif edib.
Fransanın daxili işlər naziri isə daha əvvəl ölkədə baş verən meşə yanğınlarını “misli görünməmiş və fövqəladə” adlandıraraq, ilin əvvəlindən bəri 13 min 500-dən çox yanğın ocağının qeydə alındığını açıqlayıb.
