Azərbaycan Qida Təhlükəsizliyi Agentliyi (AQTA) Gəncə və Samuxda iyulun 12–17-də baş vermiş qida zəhərlənmələri ilə bağlı araşdırmaların nəticələrini açıqlayıb.
Agentlikdən bildirilib ki, laborator müayinələr zamanı hazır yeməkdə Staphylococcus aureus, lavaşda Staphylococcus aureus və koliform bakteriyaları, pendirdə isə Escherichia coli (E.coli) aşkarlanıb.
AQTA-nın məlumatına görə, bu nəticələr qida məhsullarının mikrobioloji çirklənməyə məruz qaldığını, istehsal və emal zamanı gigiyena və sanitariya qaydalarına tam əməl olunmadığını göstərir.
Nəzarət tədbirləri çərçivəsində həmin lavaşın satıldığı digər obyektlər də müəyyən edilib və məhsulların geri çağırılması təmin olunub.
Aşkar olunan qanun pozuntuları ilə bağlı aidiyyəti dövlət qurumlarına məlumat verilib. AQTA vətəndaşlara qida məhsullarını yalnız rəsmi qeydiyyatdan keçmiş və qida təhlükəsizliyi tələblərinə uyğun fəaliyyət göstərən satış obyektlərindən almağı tövsiyə edib.
