Alyaska akvatoriyasında hərəkət edən ekspedisiya gəmisində növbəti norovirus infeksiyası qeydə alınıb. Hazırda sərnişinlərin təxminən üçdəbir hissəsi virusa yoluxub.
ABŞ səhiyyə qurumlarının məlumatına görə, bu, may ayının sonundan etibarən həmin gəmidə qeydə alınan üçüncü norovirus hadisəsidir.
İnfeksiya iyulun 12-də Sitka limanından yola düşən “National Geographic Sea Bird” gəmisində aşkarlanıb. ABŞ Xəstəliklərə Nəzarət və Profilaktika Mərkəzinin məlumatına əsasən, göyərtədə olan 62 sərnişindən 18-də qusma və qarın spazmları ilə müşayiət olunan bağırsaq infeksiyası müəyyən edilib.
Xəstəliyin yayılmasının qarşısını almaq məqsədilə yoluxan sərnişinlər təcrid olunub, gəmidə təmizlik və dezinfeksiya tədbirləri gücləndirilib.
Rəsmilər bildiriblər ki, infeksiyanın yayılma mənbəyi hələ müəyyən edilməyib.
