Daxili İşlər Nazirliyinin Kibercinayətkarlıqla Mübarizə Baş İdarəsi tərəfindən ölkə ərazisində qanunsuz onlayn qumar oyunlarının təşkilinə qarşı əməliyyat keçirilib.
Əməliyyat nəticəsində qanunsuz onlayn qumar oyunlarının təşkilində şübhəli bilinən Xəqani Əlizadə, Vüsal Tağıyev, Asim Zeynal, Emin Mahmudov, Sultanəli Bayramov və Tural Kərimli saxlanılıblar.
Araşdırmalar zamanı müəyyən edilib ki, həmin şəxslər Bakının Yasamal rayonunda icarəyə götürdükləri mənzildə ölkə ərazisində istifadəsi qadağan olunan “chckeeper.net” internet resursu üzərindən “Tilk007”, “Rahat001” və “Rahat98” adlı virtual kassalar yaradıblar.
Onların “Jaguar casino” və “Rahat casino” adlı profillər vasitəsilə qanunsuz onlayn mərc və qumar oyunları təşkil etdikləri, iştirakçıların “WhatsApp” və “Telegram” platformaları vasitəsilə cəlb olunmasını və pul vəsaitlərinin qəbulunu təşkil etdikləri müəyyənləşdirilib.
Mənzilə baxış zamanı qanunsuz fəaliyyətdə istifadə olunduğu müəyyən edilən 55 mobil telefon, 177 bank kartı, həmçinin digər elektron məlumat daşıyıcıları və materiallar aşkar edilərək götürülüb.
Araşdırmalara əsasən, saxlanılan şəxslərin qanunsuz onlayn qumar fəaliyyəti çərçivəsində həyata keçirdikləri maliyyə əməliyyatlarının ümumi dövriyyəsi 5 milyon manatdan çox olub.
Faktla bağlı Baş İdarədə Cinayət Məcəlləsinin müvafiq maddələri ilə cinayət işi başlanılıb. Şəxslərin hər biri təqsirləndirilən şəxs qismində istintaqa cəlb edilib.
Məhkəmənin qərarı ilə onların barəsində həbs qətimkan tədbiri seçilib.
Hazırda qanunsuz fəaliyyət mexanizminin və maliyyə əməliyyatlarının müəyyənləşdirilməsi istiqamətində əməliyyat-istintaq tədbirləri davam etdirilir.
