Azərbaycanda kənd təsərrüfatının maliyyələşdirilməsi adı ilə dövlətə məxsus “Aqrarkredit” QSC-dən 100 milyon manatdan çox kredit götürərək vəsaiti təyinatı üzrə istifadə etməməkdə şübhəli bilinən bir qrup şəxs saxlanılıb.
“Qafqazinfo” xəbər agentliyinin əldə etdiyi özəl məlumata görə, əməliyyat nəticəsində “Şurabad quşçuluq” MMC-nin direktoru Fuad Süleymanov, “Şurabad broyler”in direktoru Tofiq Musayev, “Salyansüd” MMC-nin qanuni təmsilçisi Fazil Rüstəmov, eləcə də Faiq Rüstəmov, Süleyman İsmayılov və Yaşar Qurbanov həbs olunublar.
İlkin istintaqa əsasən, həmin şəxslər kənd təsərrüfatının inkişafı məqsədilə ayrılan kreditləri şəxsi ehtiyaclara yönəndiriblər.
Onlara Cinayət Məcəlləsinin 178.4-cü (xüsusilə külli miqdarda dələduzluq) maddəsi ilə ittiham irəli sürülüb və barələrində 4 aylıq həbs qətimkan tədbiri seçilib.
İstintaq çərçivəsində “Aqrarkredit” QSC-nin sabiq rəhbəri Məmməd Musayev barəsində də cinayət təqibi aparıldığı bildirilir.
